2026/06/02
Pelota Pro Liga Fundazioak pilotarekin lotutako interes orokorreko jarduerak sustatzeko eta garatzeko helburuarekin hasi du bere jarduera, gizartean duen presentzia indartzeko eta etorkizuneko belaunaldien artean bere hazkundea bermatzeko.
Sortu berri den Pelota Pro Liga Fundazioa irabazi-asmorik gabeko erakundea da, eta bere jarduera pilotari laguntzea, ekitaldiak antolatzea, formakuntza, ikerketa, kirol-jardunaren sustapena, gazteekin lan egitea eta kirol hori hazten eta zabaltzen lagunduko duten gizarte-ekimenak garatzea da.
Pilota indartzen eta garatzen laguntzeko jarduera ildo nagusien artean, pilotari lotutako kirolari, klub eta erakundeei laguntza ekonomikoa eta antolamendukoa ematea nabarmentzen da. Ildo beretik, Karlos Arguiñanok, Pelota Pro Liga Fundazioaren presidenteak, hiru sorta kirol material eman dizkie gaur arratsaldean profesionaletan debuta egin duten azken hiru pilotarien prestakuntza klubei. Oiartzungo Oiarpe, Lazkaoko LAPKE eta Goizuetako Umore Ona klubetako Unax Landa, Beñat Zubizarreta eta Beñat Apezetxea pilotariek hiru pilota sorta jaso dituzte Karlos Arguiñanoren eskutik.
Gainera, Fundazioak pilotaren ikusgarritasuna eta zabalkundea areagotzeko ekimenak garatuko ditu, haren hazkundea eta proiekzio soziala bultzatzen duten proiektuetan aktiboki parte hartuz. Horretarako, aliantzak ezarriko ditu gizarte-, formakuntza-, kultura-, kirol- eta arte-erakunde eta instituzioekin, sinergiak sortzeko eta haien ekintzen irismena handitzeko.
Fundazioak arreta berezia eskainiko dio bere konpromiso sozialari, eta, horretarako, besteak beste, gizarte-bazterketa arriskuan dauden pertsonei zuzendutako ekintza zibikoak eta solidarioak ezarriko ditu.
Ikuspegi horrekin ekingo dio Pelota Pro Liga Fundazioak bere bideari, pilota hazi, modernizatu eta sendotzearen alde eginez, etorkizuneko belaunaldientzat kirol, kultura eta gizarte erreferente nabarmena den heinean.