CaixaBank Mastersa Oiartzunen, Lizarran eta Beran izango da hirugarren jardunaldian

2026/07/28

Lehiaketako hirugarren jardunaldia ostiralean hasiko da, oraindik punturik lortu ez duten hiru bikoterekin.

CaixaBank Mastersa hirugarren jardunaldira bidean doa. Ostiral honetan, Altuna III-Imaz eta Elordi-Mariezkurrena II bikoteen arteko norgehiagoka jokatuko da Oiartzunen. Altuna III-Imaz bikoteak lehen puntuaren beharra du, sailkapen ligak sei jardunaldi besterik ez baititu. Elordi-Mariezkurrena II.a, bestalde, jokatu duten partida bakarra irabazita iritsiko dira, lehen jardunaldian lortutako garaipenaren ondoren. Elordik eta Altuna III.ak 10 aldiz jokatu dute elkarren aurka bikoteka, eta momentuz 6 garaipen lortu ditu amezketarrak eta 4 mallabiarrak.

Igandean CaixaBank Mastersak Lizarra bisitatuko du. Oiartzunen bezala, orain arte jasotako bi porrotek norabide aldaketa eskatzen diete Larrazabal-Zabaletari. Aurrean Zabala-Iztueta izango dituzte, bi garaipenetatik bi lortu dituen bikotea. Bi aurrelarien arteko balantza Larrazabalen alde dago une honetan, errioxarra gainditu baitu euren artean jokatutako 12 partidetatik 7tan.

Eta asteartean, abuztuak 4, CaixaBank Mastersaren hirugarren jardunaldia itxiko du Berako urteroko jaialdiak. Ezkurdia eta Albisu garaipen gosez iritsiko dira, bi porrotekin. Laso-Martija, berriz, Larrazabal-Zabaletaren aurka Luzaiden lortutako garaipen landuarekin indartuta helduko dira. Ezkurdiak eta Lasok 16 aldiz jokatu dute elkarren aurka eta Bizkarret-Gerendiaingo aurrelariak 10 aldiz irabazi dio.

Jaialdietarako sarrerak www.entradasfronton.com atarian eskuratu daitezke.